تعلم، أكبر موقع عربي بالعالم

الروتين

 

لما أدخل المطبخ أعمل أكل
ويكون زوجي دخل استخدم المطبخ قبلي
باتضايق لما أمسك برطمان توابل ومايطلعش هو اللي أنا عايزاه، عشان زوجي مارجعش التوابل بنفس الترتيب اللي أنا حافظاه

وبأحس بالاحباط لإني باستهلك وقت أطول إني أدور على البرطمان المطلوب
في حين إني في الطبيعي بأمد إيدي وأخد البرطمان من غير ما أبص أصلا عشان حافظة أماكنهم ومتعودة عليها

باتضايق لما ألاقي الأداة اللي هاستخدمها زي السكينة أو الجهاز زي الخلاط مثلا مش مغسول
وبأحس بالاحباط لإني هاستهلك مجهودي في الغسيل وتجهيز الأدوات أولا
وحماسي للطبخ نفسه بيقل تدريجيا مع المواقف دي

الوضع ده مشابه جدًا للي درسته عن الأطفال في منتسوري
وليه الأطفال بيحبوا النظام والروتين، سواء في الأفعال أو حتى في ترتيب البيئة حواليهم

عشان يحسوا بالراحة والسيطرة، لازم يكونوا عارفين لو احتاجوا أداة أو لعبة ما هايلاقوها فين بالظبط وبعد ما يخلصوها هايرجعوها فين بالظبط لأن مكانها ثابت، مش كل يوم مكانها بيتغير

ولما يلاقوها لازم تكون في حالة تسمح إنهم يستخدموها على الفور، مش لسة محتاجة خطوات لتجهيزها للاستخدام عشان ده بيقلل حماسهم لاستخدامها

لازم يكونوا عارفين ايه اللي مفروض هايحصل بالعادة، ومطلوب منهم يعملوا ايه
عشان دماغهم ترتاح من التفكير في “هاعمل إيه” ويركزوا في “هاعمل إزاي”

ولذلك في فصول منتسوري، الأدوات والأنشطة على الرف بيفضل مكانها ثابت من بداية العام الدراسي لنهايته، مش كل يومين بحال

ومن قواعد استخدام الأدوات والأنشطة إن الطفل لما يخلص شغل بيها، يرجعها على الرف على نفس الحال اللي أخدها بيه، بحيث إن زميله لما يجي ياخدها تكون جاهزة انه يشتغل بيها على طول

واليوم بشكل عام بيكون فيه روتين ثابت من وقت بدء الأنشطة والاستراحات وتناول الطعام والمغادرة وهكذا
فبتلاقي الأطفال في الفصل ده معتمدين على نفسهم بشكل كبير وعارفين هم بيعملوا ايه، ومش بيحتاجوا تدخل كبير من المعلم في أنشطتهم اليومية

حلو إننا نحط نفسنا مكان الأطفال عشان نفهمهم أكتر صح؟

اترك تعليقا

لن يتم نشر عنوان بريدك الإلكتروني. الحقول الإلزامية مشار إليها بـ *