تعلم، أكبر موقع عربي بالعالم

اللغة المناسبة التى يتعلمها الطفل

 

في مادة “طرق أو منهجيات التدريس للأطفال”
بنتعلم إزاي نعدل في طريقة تقديم الدرس وتقييم الأطفال، عشان نراعي القدرات المتفاوتة اللي موجودة في الفصل
Differentiated Instruction
وبيتكلموا عن الأطفال ذوي الاحتياجات التعليمية المختلفة
زي الأطفال اللي بيعانوا من صعوبات تعلم، أو عندهم إعاقات حسية أو جسدية، أو حتى الأطفال المتقدمين أو يقال عنهم موهوبين، واللي بتكون قدراتهم أعلى من المستوى اللي بيتم تدريسه

اللي لفت نظري في الموضوع ده إيه بقى؟
إنهم حاطين ضمن الأطفال اللي محتاجين عناية خاصة …
” الأطفال اللي بيتعلموا الانجليزي كلغة ثانية لهم ” !!!!
خلي بالكم أنا بادرس تبع جامعة أمريكية، يعني الكلام ده على المدارس في أمريكا
متخيلين؟!
الأطفال عندهم اللي بيتعلموا بالإنجليزي وهو لغة ثانية بالنسبة لهم بيحتاجوا إن المعلم يراعي إنهم بيعانوا ويحاول يعدل في الدرس عشان يكون ملائم لهم

وكان في درس سابق درسنا بالتفصيل عن موضوع اللغة ده
وأد إيه مهم جدا إن الطفل يكون قوي في لغته الأم، والمعلم في الفصل يشجع الطفل على استخدامها وينبه الأم والأب إنهم يستخدموها مع الطفل عشان يتقنها، وإن هي الأساس عشان يقدر يتعلم اللغة الانجليزية اللي هي لغة تانية بالنسبة له
وإنه لو الطفل اتجه للغة ثانية وساب لغته الأم هاينتكس ف الاتنين وهايأثر سلبا على تحصيله الدراسي!

وحتى في اختبارات القراءة اللي بيتوقف عليها انتقال الطفل من الصف الثالث الابتدائي إلى الرابع الابتدائي
“Move on when reading “
اللي كلمتكم عنها ف فيديو قبل كده، بيعملوا استثناء للطفل اللي الانجليزي بالنسبة له لغة ثانية لأن مستواه طبيعي بيكون أقل من أقرانه اللي بيتعلموا بالانجليزي وهو لغتهم الأم

تفاصيل كتير بجد ناوية أقولكم عليها إن شاء الله في موضوع اللغة ده بالذات
بس النقطة اللي كتبتها فوق دي تحديدا كنت لسة باذاكرها امبارح وأثرت فيا جدا
لأن بالرغم من إن السؤال بتاع
” الطفل يدرس المواد بلغته ولا بلغة ثانية ؟ ” ده قُتل بحثا
إلا إنه كل شوية يجيلي رسالة بنفس ذات السؤال

الموضوع مش إن الطفل بيعرف يحفظ ويفهم ويحل الامتحان بالانجليزي يا جماعة خالص
لأن الحفظ والفهم أصلا هم أقل مراتب مهارات التفكير اللي بنطمح إن الطفل يوصلها
في 6 مراتب لمهارات التفكير
وعشان الطفل يوصل لمهارات التفكير العليا اللي هي التحليل والنقد والإبداع لازم يكون متمكن جدا من اللغة اللي بيفكر بيها وبيستخدمها للتعبير، واللي هي بالتأكيد لغته الأم

ربنا ينور بصيرتنا جميعًا ويكتب لنا الخير
(دعــ مجدي ــاء

اترك تعليقا

لن يتم نشر عنوان بريدك الإلكتروني. الحقول الإلزامية مشار إليها بـ *